शीतल टाईम्स // पुण्यात “ॲपवाले बाबा”चा भांडाफोड; गुप्त अॅप्स लावून अनुयायांना ब्लॅकमेल करत होता, लैंगिक अत्याचार व आर्थिक फसवणुकीचा आरोप
पुण्यात “ॲपवाले बाबा”चा भांडाफोड;
गुप्त अॅप्स लावून अनुयायांना ब्लॅकमेल
लैंगिक अत्याचार; आर्थिक फसवणुकीचा आरोप
पुणे (प्रतिनिधी) : पुण्यातील बावधन परिसरात राहणाऱ्या प्रसाद दादा भिमराव तामदार या स्वयंघोषित बाबावर पोलिसांनी गंभीर स्वरूपाचे गुन्हे दाखल करत अटक केली आहे. “ॲपवाले बाबा” या नावाने ओळखल्या जाणाऱ्या या बाबाने शेकडो अनुयायांना आध्यात्मिक उपाय, दैवी शक्तीचा आभास देत आपल्या जाळ्यात ओढले होते.
पोलीस तपासानुसार, हा बाबा आपल्या भक्तांच्या मोबाईलमध्ये गुप्तपणे स्पाय अॅप्स बसवायचा. या अॅप्सच्या माध्यमातून अनुयायांचे वैयक्तिक फोटो, व्हिडिओ, संभाषण आणि खाजगी माहिती गोळा केली जायची. या माहितीचा वापर करून बाबा लोकांना ब्लॅकमेल करत असे व मोठ्या प्रमाणात पैसे उकळत असे.
फक्त आर्थिक फसवणूकच नाही तर, याच बाबाने अनेक अनुयायांवर लैंगिक अत्याचार केल्याचाही धक्कादायक आरोप करण्यात आला आहे. पुरुष भक्तांना “दैवी शक्ती” मिळवण्यासाठी काही विशिष्ट क्रिया करण्यास भाग पाडले जात होते.
या प्रकरणाची तक्रार एका युवकाने पुणे पोलिसांकडे दाखल केली होती. तपासादरम्यान बाबाच्या फोन आणि लॅपटॉपमध्ये अनेक अनुयायांचे व्हिडिओ, खाजगी माहिती आणि आर्थिक व्यवहाराची नोंदी सापडल्या आहेत.
पोलिसांनी दिलेल्या माहितीनुसार, बाबाच्या कारनाम्यांमध्ये आर्थिक फसवणूक, लैंगिक शोषण, ब्लॅकमेलिंग, तसेच महाराष्ट्र अंधश्रद्धा निर्मूलन कायद्यांतर्गत गुन्हे दाखल करण्यात आले आहेत.
पोलिसांकडून मिळालेल्या माहितीनुसार, या बाबाचा नेटवर्क मोठ्या प्रमाणात पसरलेला आहे. अनेक ठिकाणी त्याचे कार्यक्रम व प्रवचन झाले असून, अनेक लोक त्याच्या तावडीत सापडले असल्याची शक्यता व्यक्त केली जात आहे.
सध्या बाबा पोलीस कोठडीत असून पुढील तपास सुरू आहे. पोलिसांनी नागरिकांना आवाहन केले आहे की, कोणीही फसवणुकीचा किंवा ब्लॅकमेलचा बळी पडले असल्यास पुढे येऊन तक्रार द्यावी.
📌 ठळक मुद्दे
- मोबाईलमध्ये गुप्तपणे स्पाय अॅप्स बसवून ब्लॅकमेल
- दैवी शक्तीच्या नावाखाली लाखोंची फसवणूक
- लैंगिक अत्याचाराचे गंभीर आरोप
- आरोपी पोलीस कोठडीत; पुढील तपास सुरू
शीतल टाईम्स विशेष बातमी
टिप्पण्या
टिप्पणी पोस्ट करा