शीतल टाईम्स //- "स्टॅन्ड खाली राहिलंय भावा!" रस्त्यावरच्या अनामिकाची एक माणुसकीची हाक!
शीतल टाइम्स प्रतिनिधी
.png)
"स्टॅन्ड खाली राहिलंय भावा!" रस्त्यावरच्या अनामिकाची एक माणुसकीची हाक!
शीतल टाईम्स विशेष-
शहरातील रस्त्यांवर एक विशेष दृश्य वारंवार दिसून येते, मोटरसायकलस्वाराचे स्टॅन्ड खाली राहिलेले असते, आणि कोणीतरी अनोळखी व्यक्ती हसतच त्याला ओरडून सांगते, “भाऊ, स्टॅन्ड खाली राहिलंय!”
हा प्रसंग छोटासा असला, तरी त्यामागे मोठी सामाजिक जाणीव आणि माणुसकीची झलक दिसते. अशा वेळी त्या ‘हितचिंतकां’कडे फारसं कोणाचं लक्ष जात नाही, पण हेच ते लोक आहेत जे अपघात टाळण्याच्या दृष्टिकोनातून एक महत्त्वाचं काम करत असतात.
साधारणपणे पाहिलं तर, "मोटरसायकलचे स्टॅन्ड खाली राहिल्याने अपघात झाल्याचं" प्रकरण फारसं ऐकिवात नाही. मात्र अशा स्थितीत वळणावर किंवा गतिरोधकावर स्टॅन्ड जमिनीला घासून गाडीचे नियंत्रण बिघडू शकते. विशेषतः नवीन चालकांसाठी हा धोका अधिक असतो. अपघाताचं कारण नसलेला तरीही संभाव्य धोका असतोच! म्हणूनच असे हितचिंतक अगदी वेळोवेळी सावध करत असतात.
आपापल्या वाटेने चालणाऱ्या लोकांमध्ये अशी सामाजिक जाणीव जागी असणे ही समाजाच्या आरोग्यासाठी आणि सुरक्षिततेसाठी सकारात्मक बाब आहे. मदतीची ही भावना केवळ अपघात टाळण्यापुरती मर्यादित राहत नाही, तर आपुलकी, बंधुता आणि सार्वजनिक जबाबदारी या मूल्यांचाही परिचय करून देते.
रस्त्यावर उभे राहून, कधी ट्राफिकमध्ये, कधी पादचारी म्हणून, अशा वेळी दुसऱ्याची गाडी थांबवून “स्टॅन्ड वर घ्या!” अशी एक साधी आठवण करून देणाऱ्या व्यक्तीला आपण कदाचित काही क्षणांत विसरतो, पण त्या कृतीचा परिणाम अनेकदा मोठा आणि सकारात्मक असतो.
आजच्या धावपळीच्या काळात अशा लहानशा पण अर्थपूर्ण कृती समाजात "माणुसकी अजून जिवंत आहे" याचा पुरावाच असतात. अशा प्रत्येक अज्ञात हितचिंतकाला मन:पूर्वक सलाम!
सुहास शेलार, उपसंपादक - शीतल टाईम्स
टिप्पण्या
टिप्पणी पोस्ट करा